Emirates ekonom sinifində inqilabi yeniliyə başlayır: Boyun yastığına ehtiyac qalmayacaq
Dubayda yerləşən Emirates Hava Yolları ekonom sinif sərnişinlərinin rahatlığını artırmaq üçün dünya aviasiyasında ilk hesab olunan yeni texnologiyanı təqdim edib. Şirkətin hazırladığı "U-Dream" adlı innovativ baş dayağı uzun məsafəli uçuşlarda boyun yastığından istifadə ehtiyacını aradan qaldırmağı hədəfləyir.
Yeni baş dayağı artıq Emirates-in Airbus A350 təyyarələrində quraşdırılmağa başlanıb. Şirkət ilin sonunadək bütün A350 parkını bu sistemlə təchiz etməyi planlaşdırır. 2027-ci ildən isə yenilənmiş Airbus A380 və Boeing 777 təyyarələrinə də quraşdırılacaq. Bundan əlavə, sifariş edilən bütün yeni Boeing 777X təyyarələri bu baş dayağı ilə zavoddan çıxacaq.
Boyun və baş üçün tam dəstək
"U-Dream" baş dayağı yumşaq dəri örtüyə və qatlanan elastik yan hissələrə malikdir. Sərnişin oturacaqda yuxuya gedərkən bu qanadvari hissələr başı və boynu hər iki tərəfdən dəstəkləyir. Beləliklə, başın irəli və ya yana əyilməsi minimuma enir və uzun uçuşlarda daha rahat istirahət etmək mümkün olur.
Sistem həmçinin hündürlüyə uyğun yuxarı-aşağı hərəkət edir və müxtəlif bədən quruluşuna malik sərnişinlər üçün fərdi tənzimləmə imkanı yaradır. Bu xüsusiyyət onu adi oturacaq başlıqlarından fərqləndirir.
Emirates: "Oyunun qaydalarını dəyişir"
Emirates-in prezidenti Tim Klark bildirib ki, şirkət sərnişin rahatlığını daim inkişaf etdirməyə çalışır və yeni baş dayağı xüsusilə uzun məsafəli reyslərdə ekonom sinif üçün ciddi üstünlük yaradacaq.
Onun sözlərinə görə, yeni sistem boynu tam dəstəklədiyi üçün artıq əlavə boyun yastığı daşımağa ehtiyac qalmayacaq. (euronews)
Aviaşirkətlər ekonom sinfini yenidən dizayn edir
Son dövrlər aviaşirkətlər yalnız biznes və birinci sinifə deyil, ekonom sinfə də daha çox investisiya yatırırlar. ABŞ-ın United Airlines orta oturacağı olmayan Economy Plus sıralarını təqdim edib, Air New Zealand isə ultra uzunməsafəli reyslərdə bron edilə bilən ikimərtəbəli çarpayı xidmətini istifadəyə verib. Emirates-in "U-Dream" sistemi də bu tendensiyanın növbəti mərhələsi hesab olunur.
Mütəxəssislərin fikrincə, ekonom sinifdə rahatlığı artıran bu cür innovasiyalar yaxın illərdə digər iri aviaşirkətlər tərəfindən də tətbiq oluna bilər. Uzunməsafəli uçuşların sayının artdığı bir dövrdə sərnişin komfortu aviaşirkətlər arasında rəqabətin əsas istiqamətlərindən birinə çevrilir.
