Neftin qiyməti Səudiyyə Ərəbistanının tədarükü artırması ilə ucuzlaşıb (23.09.2026)
Neftin qiyməti Səudiyyə Ərəbistanının tədarükü artırması və ABŞ-İran münaqişəsinin diplomatik yolla həllinə dair gözləntilərin güclənməsi fonunda geriləyib.
ENA.az xəbər verir ki, “Brent” markalı neftin qiyməti 0,07% azalaraq bir barel üçün 99,18 dollara, Qərbi Texas nefti (WTI) isə 0,39% ucuzlaşaraq 90,17 dollara düşüb.
Səudiyyə Ərəbistanının Şərq-Qərb neft kəmərində əməliyyatları yenidən bərpa etməsi Yaxın Şərqdən neft tədarükünün artacağına dair gözləntiləri gücləndirib. Riyadın sentyabrın 11-də hücumlar səbəbindən kəmərin fəaliyyətini dayandırdığı bildirilmişdi.
Bununla yanaşı, Nyu-Yorkda ABŞ və İran nümayəndələri arasında danışıqların keçirilməsi münaqişənin diplomatik yolla həllinə dair ümidləri artırıb. Bu amillər neft bazarında tədarük risklərinin azalacağı gözləntilərini gücləndirib.
