Rusiyada benzin krizi daha da dərinləşir. Yerli şirkətlərə distant işə keçmək tövsiyə olunub
Novosibirsk vilayətində 8 iyulda yanacaq çatışmazlığı səbəbindən yüksək hazırlıq vəziyyəti elan edilib. Regional hökumətin qərarına əsasən, yerli şirkətlərə işçilərini məsafədən işə keçirmələri və benzin istehlakını azaltmaları tövsiyə edilib.
Sakinlərə isə öz növbəsində yüksək hazırlıq vəziyyəti ləğv olunana qədər bölgə daxilində və xaricində şəxsi nəqliyyat vasitələrindən istifadəni məhdudlaşdırmaları tövsiyə edilib. Bu, sonrakı xəbərdarlığa qədər qüvvədə qalacaq.
Tomsk vilayətində hökumət məmurlara yanacaq böhranı səbəbindən daha çox onlayn görüşlər keçirməyi tövsiyə edib, deyə bölgənin inzibati işlər üzrə qubernator müavini Olqa Krılova RİA Tomsk agentliyinə bildirib.
Yanacaq böhranı Rusiyanın demək olar ki, bütün bölgələrini əhatə edib. Hakimiyyət orqanları benzin satışına məhdudiyyətlər tətbiq edir və yanacaqdoldurma məntəqələrində növbələri azaltmaq və asayişi bərpa etmək üçün müxtəlif tədbirlər görür, o cümlədən yanacaqdoldurma məntəqələrində Milli Qvardiya və polis yerləşdirilib. Vəziyyət ən ağır Transbaikal bölgəsindədir, burada sürücülər bir neçə gün növbədə dayandıqlarını bildiriblər. Vəziyyət həmçinin İrkutskda da gərgindir, burada mer təşkilat rəhbərlərindən məsafədən işə keçməyi düşünməyi xahiş edib.
