BYD-nin xarici bazarlara satışları iki dəfədən çox artıb
Çinin elektrik avtomobili istehsalçısı BYD oktyabr ayında satışlarını illik müqayisədə 11% artıraraq ardıcıl altıncı ay artım qeydə alıb. Şirkətin nəticələrinə əsas töhfəni xarici bazarlara tədarükün kəskin yüksəlməsi verib.
ENA.az Reuters-ə istinadən xəbər verir ki, BYD ötən ay 490 168 avtomobil satıb. Bununla belə, satış artımının tempi sentyabr ayındakı 17%-lə müqayisədə zəifləyib.
Oktyabrda şirkətin xarici bazarlara avtomobil tədarükü illik müqayisədə 102,8% artaraq 170 194 ədədə çatıb. Beləliklə, ixrac BYD-nin Çində zəif tələbat və güclü qiymət rəqabəti ilə üzləşdiyi şəraitdə ümumi satış artımını dəstəkləyib.
Qeyd edək ki, BYD-nin üçüncü rüb üzrə mənfəət artımı illik müqayisədə 28%-ə qədər yavaşlayıb və bu göstərici bazar gözləntilərini doğrultmayıb. Şirkət həmçinin Avropaya hibrid avtomobil ixracı ilə bağlı mümkün yeni məhdudiyyətlərlə üzləşə bilər.
Reuters-in məlumatına görə, Çinin daxili avtomobil bazarında 2027-ci ildə müəyyən bərpa gözlənilir.
