Əsas məzmuna keç
Bakı +7°, az buludlu
--:--:--
Tez-tez axtarılanlarBölmələr
Proqram həlləri

“Claude”da rəsmi dəstəklənən ölkələrin siyahısına Azərbaycan da daxildir. “Yeni qadağa” xəbərləri kimlərə aiddir?

“Claude”da rəsmi dəstəklənən ölkələrin siyahısına Azərbaycan da daxildir. “Yeni qadağa” xəbərləri kimlərə aiddir?

Süni intellekt aləti Claude-dan istifadə edənlər üçün diqqətçəkən bir məqam var: şirkətin xidmətlərindən yararlanmaq üçün xaricdə yaşamaq və ya işləmək heç də hər zaman kifayət etmir. Anthropic-in qaydalarına əsasən, dəstəklənməyən ölkələrdə qeydiyyatdan keçmiş şirkətlərin əməkdaşları, hətta başqa ölkədə fəaliyyət göstərsələr belə, bu xidmətdən istifadə edə bilməzlər. Bu məhdudiyyət noyabrın 12-dən qüvvəyə minir.

Noyabrın 11-də sosial şəbəkələrdə və media orqanlarında ABŞ-nin Anthropic şirkətinin Claude çatbotuna çıxışla bağlı yeni məhdudiyyət tətbiq edəcəyi barədə xəbərlər yayılıb. İddialara görə, noyabrın 12-dən etibarən Rusiya şirkətlərinin əməkdaşları başqa ölkələrdə işləsələr belə, Claude-dan istifadə edə bilməyəcəklər.

Anthropic şirkətinin rəsmi məlumatına görə, Claude AI-nin istifadəsi ölkə və regionlar üzrə məhdudlaşdırılır. 12 noyabr 2026-cı il tarixindən qüvvədə olan yenilənmiş siyahıya əsasən, yalnız şirkətin dəstəklədiyi ölkələrdə Claude xidmətlərindən istifadə etmək mümkündür. Siyahıda olmayan ölkələr isə dəstəklənmir.

Claude-un dəstəkləmədiyi ölkələrin siyahısına aşağıdakılar daxildir:

·         Əfqanıstan

·         Belarus

·         Çin

·         Kuba

·         İran

·         Şimali Koreya

·         Rusiya

·         Suriya

·         Venesuela

·         Yəmən

Bu, tam siyahı deyil. Anthropic-in qaydasına görə, dəstəklənən ölkələr siyahısında olmayan istənilən ölkə və region məhdudiyyətə daxildir.

Azərbaycanla bağlı vacib məqam

Azərbaycan Anthropic-in rəsmi dəstəklənən ölkələr siyahısında yer alır. Deməli, Azərbaycanda fiziki olaraq olan istifadəçilər Claude-un rəsmi xidmətlərindən istifadə edə bilərlər (rəsmi siyahı: Anthropic – Supported Regions Policy)

Bir vacib detalı da qeyd edək ki, məhdudiyyət yalnız istifadəçinin harada olmasına aid deyil. Anthropic-in siyasətinə əsasən, dəstəklənməyən ölkədə qeydiyyatdan keçmiş və ya mərkəzi ofisi həmin ölkədə yerləşən təşkilatlara da məhdudiyyət tətbiq edilə bilər.

Claude-dan kimlər istifadə edə bilməz?

Anthropic-in qaydaları yalnız istifadəçinin fiziki olaraq hansı ölkədə olmasına əsaslanmır. Şirkət həmçinin istifadəçinin çalışdığı təşkilatın qeydiyyat yerini və mülkiyyət strukturunu nəzərə alır.

Məhdudiyyətlər üç əsas qrupu əhatə edir:

·         Dəstəklənməyən ölkələrdə fiziki olaraq olan şəxslər. Claude-un rəsmi dəstəklədiyi regionlar siyahısına daxil olmayan ölkələrdə yaşayan və ya həmin ərazilərdə olan istifadəçilər xidmətdən yararlana bilməzlər.

·         Həmin ölkələrdə qeydiyyatdan keçmiş şirkətlər və onların əməkdaşları. Şirkətin əməkdaşı Claude-un dəstəklədiyi başqa ölkədə olsa belə, təşkilatın qeydiyyat yeri məhdudiyyətə səbəb ola bilər.

·         Məhdudiyyət tətbiq edilən ölkələrin şəxsləri və ya təşkilatları tərəfindən nəzarət olunan şirkətlər. Şirkət başqa ölkədə qeydiyyatdan keçsə də, onun nəzarət paketi birbaşa və ya dolayı yolla dəstəklənməyən regionlardakı şəxslərə və təşkilatlara məxsusdursa, məhdudiyyətlər ona da şamil oluna bilər.

Beləliklə, məsələn, Rusiya şirkətinin əməkdaşı Türkiyədə, Gürcüstanda və ya başqa dəstəklənən ölkədə işləsə belə, işəgötürən şirkətin statusuna görə Claude-a çıxışını itirə bilər.

Bəs Anthropic qaydalarında nə dəyişib?

Dəyişikliklər əsasən aşağıdakı istiqamətləri əhatə edir:

·         Dövlət mediası, təbliğat qurumları və kommersiya şirkətlərinin saxta hesablar və uydurma xəbər saytları şəbəkələri yaratmaq üçün Claude-dan istifadə etməsinə dair qadağalar bir bölmədə birləşdirilib.

·         Seçiciləri aldatmaq və ya seçkilərin keçirilməsinə mane olmaq məqsədilə süni intellektdən istifadə ilə bağlı qaydalar dəqiqləşdirilib.

·         Silahların hədəfə yönəldilməsi və idarə olunması üçün proqram təminatının yaradılmasında Claude-dan istifadəyə qadağa daha konkret ifadə edilib.

·         İzləmə fəaliyyəti və hüquq-mühafizə orqanlarının işi ilə bağlı müddəalar dəqiqləşdirilib.

·         Səhiyyə, maliyyə və hüquq kimi yüksək riskli sahələrdə çatbotdan istifadəyə dair tələblər yenidən işlənib.

·         Süni intellekt modellərinə qarşı davamlı, təhqiredici və qəddar davranış qadağan edilib.

Süni intellekt bazarında coğrafi məhdudiyyətlər yeni reallığa çevrilir

Anthropic-in nümunəsi süni intellekt xidmətlərindən istifadədə coğrafi və korporativ məhdudiyyətlərin əhəmiyyətini göstərir. İstifadəçinin başqa ölkədə olması artıq hər zaman xidmətə çıxış üçün kifayət etmir. Şirkətin harada qeydiyyatdan keçməsi, kimə məxsus olması və kim tərəfindən idarə olunması da həlledici ola bilər.

Bu yanaşma beynəlxalq şirkətlər, uzaqdan işləyən əməkdaşlar və müxtəlif ölkələrdə fəaliyyət göstərən texnologiya komandaları üçün xüsusilə əhəmiyyətlidir. Çünki bir ölkədə qeydiyyatdan keçmiş şirkətin əməkdaşı başqa ölkədə işləsə də, istifadə etdiyi süni intellekt alətinin korporativ qaydalarına görə xidmətdən kənarda qala bilər.

ENA.az TelegramdaHər gün yeniliklərdən xəbərdar olmaq üçün bizi sosial şəbəkələrdə izləyin!Bizi izlə