Geosiyasi risklərin azalması neftin qiymətini aşağı salıb
Dünya bazarında neftin qiyməti 1,5%-dən çox ucuzlaşıb. Yaxın Şərqdə münaqişənin genişlənməsi riskinin azalması, OPEC+ hasilatının artması və ABŞ-da neft ehtiyatlarının çoxalması qiymətlərə təzyiq göstərib.
ENA.az Reuters-ə istinadən xəbər verir ki, noyabrın 12-də Bakı vaxtı ilə səhər saatlarında Brent markalı neftin fyuçersləri 1,47 dollar və ya 1,58% ucuzlaşaraq bir barel üçün 91,29 dollara düşüb. WTI markalı ABŞ neftinin qiyməti isə 1,24 dollar və ya 1,43% azalaraq 85,29 dollar təşkil edib.
Qiymətlərdəki geriləmə əvvəlki gün qeydə alınan artımı silib. Çərşənbə günü Brent 1,4%, WTI isə 0,6% bahalaşmışdı.
Nissan Securities Investment şirkətinin baş strateqi Hiroyuki Kikukavanın sözlərinə görə, bazarlar Rusiya və Ukrayna arasında atəşkəsə nail olmaq üçün diplomatik səylərin davam etdiyini və ABŞ-Çin sammitinə qədər İran münaqişəsinin genişlənməyəcəyini gözləyir.
Rusiya və Ukrayna nümayəndələri Əbu-Dabidə keçirilən iki günlük danışıqlardan sonra genişmiqyaslı əsir mübadiləsi barədə razılığa gəliblər. Bununla belə, ABŞ vasitəçiləri ərazi məsələsi də daxil olmaqla, bir sıra əsas mövzularda fikir ayrılıqlarının qaldığını bildiriblər.
Neft bazarına təzyiq göstərən digər amil OPEC+ ölkələrinin hasilatının artmasıdır. Səudiyyə Ərəbistanının hasilatını artırması nəticəsində oktyabrda alyansın ümumi neft istehsalı İran müharibəsindən əvvəlki səviyyəyə yaxınlaşıb.
Bundan əlavə, Amerika Neft İnstitutunun (API) məlumatlarına əsasən, ABŞ-da kommersiya neft ehtiyatları son həftədə 9 milyon barel artıb. ABŞ Energetika Nazirliyinin rəsmi statistikasının isə cümə axşamı açıqlanması gözlənilir.
