Kirayə mənzil üçün müraciətlər niyə dayandırıldı? - İKZF-dən açıqlama
Azərbaycanda satmaq öhdəliyi ilə kirayəyə verilən mənzillər üçün yeni müraciətlərin qəbulu müvəqqəti dayandırılıb. İpoteka və Kredit Zəmanət Fondundan verilən məlumata görə, qərar müraciətlərin sayının kəskin artması ilə bağlıdır.
Belə ki, son dövrlərdə “Elektron ipoteka və kredit zəmanət” sistemi üzərindən hər gün 100-dən artıq müraciət qeydə alınır. Nəticədə qeydiyyata alınan və görüş vaxtı təyin edilən müraciətlərin sayı seçim üçün mövcud olan kirayə mənzillərin sayını dəfələrlə üstələyib.
Müraciətlər nə vaxt dayandırılıb?
Fonddan bildirilib ki, 6 oktyabr 2026-cı il tarixindən satmaq öhdəliyi ilə kirayə mənzil mexanizmi üzrə yeni müraciətlərin qəbulu müvəqqəti dayandırılıb. Məqsəd müraciətlərin daha operativ qəbul və emal edilməsi, ərizəçilərin daha şəffaf şəkildə qiymətləndirilməsi, onlara müəyyən edilmiş tarixlərdə mənzil seçmək imkanının yaradılması və elektron sistemin funksionallığının təkmilləşdirilməsidir. Müraciətlərin yenidən nə vaxt qəbul ediləcəyi barədə isə ictimaiyyətə əlavə məlumat veriləcək.
Artıq müraciət edənlər necə olacaq?
Yeni müraciətlərin müvəqqəti dayandırılması 6 oktyabradək elektron sistemdə qeydiyyata alınmış müraciətlərə təsir etməyəcək. Həmin şəxslərin növbəliliyi və müraciətlər üzrə həyata keçirilən prosedurlar əvvəlki qaydada davam etdiriləcək. Fondun məlumatına görə, mexanizmdən yararlanmaq üçün indiyədək müraciət etmiş 12 mindən çox vətəndaşın şəxsi kabinetinə görüş günü barədə bildiriş göndərilib.
Onlar bildirişdə göstərilən tarixdə 2 saylı ASAN Kommunal və ya Sumqayıt ASAN Xidmət mərkəzlərinə müraciətlərini rəsmiləşdirmək üçün yaxınlaşa biləcəklər.
"Müraciətlərin müvəqqəti dayandırılması həmin tarixədək elektron sistemdə qeydiyyata alınmış müraciətlərə, onların növbəliliyinə və bu müraciətlər üzrə həyata keçirilən prosedurlara təsir etməyəcək" -deyə açıqlamada qeyd olunur.
10 mindən çox kirayə müqaviləsi bağlanıb
Satmaq öhdəliyi ilə kirayə mexanizmi Azərbaycan Prezidentinin 25 yanvar 2019-cu il tarixli 488 nömrəli Fərmanına əsasən həyata keçirilir. Mexanizmin əsas məqsədi şəxsi yığımları mənzil almaq üçün kifayət etməyən vətəndaşların mənzil şəraitinin yaxşılaşdırılmasıdır. 2020–2026-cı illərdə Bakı və Sumqayıt şəhərləri, eləcə də Abşeron rayonunda 17 müxtəlif ünvanda yerləşən yaşayış komplekslərində tam təmirli mənzillər vətəndaşlara təqdim edilib. Bu müddət ərzində 10 mindən artıq kirayə müqaviləsi rəsmiləşdirilib. Hazırda isə müraciətlərin sayının mövcud mənzil fondundan əhəmiyyətli dərəcədə çox olması sistemdə yüklənməyə və növbələrin uzanmasına səbəb olub.
Fond yeni müraciətlərin qəbulunun dayandırılmasını məhz bu prosesin daha operativ və şəffaf təşkili ilə əsaslandırır.
