Süni intellekt bazarında nəhəng birləşmə: Marvell Lumentum-u satın alır
ABŞ-ın çip istehsalçısı “Marvell Technology” optik şəbəkə texnologiyaları şirkəti “Lumentum”u təxminən 115 milyard dollar dəyərində, tamamilə səhm mübadiləsi yolu ilə satın almaq barədə razılığa gəlib.
ENA.az xəbər verir ki, şirkətlərin birgə açıqlamasına görə, razılaşma çərçivəsində “Lumentum”un səhmdarları sahib olduqları hər bir səhm müqabilində “Marvell”in 4,5 səhmini əldə edəcəklər. Bu mübadilə nisbəti “Lumentum”un bir səhminin dəyərini 1 132 dollar səviyyəsində qiymətləndirir və oktyabrın 28-dəki bağlanış qiyməti ilə müqayisədə 23,9% mükafat nəzərdə tutur.
Birləşmədən sonra yeni şirkətin səhmlərinin təxminən 67%-i “Marvell”in, 33%-i isə “Lumentum”un hazırkı səhmdarlarına məxsus olacaq.
Razılaşmaya əsasən, “Marvell”in elektrik və optik bağlantı, şəbəkə kommutasiyası və xüsusi çip texnologiyaları “Lumentum”un yüksək performanslı lazerlər, optik ötürücülər və optik kommutasiya sahəsindəki imkanları ilə birləşdiriləcək.
Şirkətlər birləşmədən illik 1 milyard dollardan çox xərc qənaəti əldə etməyi gözləyirlər. Əməliyyatın səhmdarların və tənzimləyici qurumların təsdiqindən sonra 2028-ci ilin ilk yarısında tamamlanması planlaşdırılır.
“Marvell”in rəhbəri Mett Mörfi süni intellekt infrastrukturunda optik bağlantı texnologiyalarına keçidin sürətləndiyini bildirib. “Lumentum”un rəhbəri Maykl Hurlston isə birləşmənin şirkətləri süni intellekt infrastrukturu sahəsində 550 milyard dollarlıq bazar imkanından yararlanmaq üçün daha əlverişli mövqeyə gətirəcəyini qeyd edib.
